Поради појава на магла, намалена е видливоста  од 50 до 100 метри на патните правци Битола – Прилеп – Плетвар, Кичево – Македонски Брод, Скопје – Куманово, Скопје – Велес, Велес – Катланово и Кочани – Штип, а на патот  Тетово – Групчин со 150 метри, информира АМСМ во вечерниот извештај за состојба на патиштата.

АМСМ соопшти дека интензитетот на сообраќај на патните правци надвор од градските средини е умерен. На граничниот премин Табановце, за излез од државата се чека околу еден час, а за влез во државата околу 40 минути. На граничниот премин Пелинце, пак, за влез и за излез од државата се чека околу 30 минути. На останатите гранични премини, од македонска страна, нема подолги задржувања за влез и за излез од државата.

Маглата од вчера го отежнува и одвивањето на авиосообраќајот од Скопскиот аеродром, каде од 20 часот синоќа до девет часот изутрината беа откажани девет лета, а  четири пренасочени. Од 9 часот денеска се одвиваше по регуларниот распоред и з алетовите до 17 часот не се очекуваа нарушувања. Од ТАВ Македонија ги упатуваат патниците да ја следат веб-страницата: skp.airports.com.mk, во делот Летови (Заминувања/Пристигнувања), каде што евентуалните промени во редовниот распоред на летови се ажурираат во реално време, како што ги добиваат информациите во нивните системи.

УХМР најави дека продолжува периодот на стабилно и претежно тивко време со релативно високи дневни температури. По котлините вклучувајќи ја и Скопската Котлина и понатаму ќе има појава на магла и ниска облачност со променлив интензитет, особено во ноќните и претпладневните часови, како и пониски дневни температури. Утре ќе дува умерен северозападен ветер, особено долж Повардарието поради што преодно ќе се намалат условите за магла.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.