На Старбакс му е наложено да му исплати на поранешна вработена белкиња 25,6 милиони долари (23,68 милиони евра) за тврдења за расна дискриминација.

Шенон Филипс, поранешна менаџерка, беше отпуштена откако двајца Афроамериканци беа уапсени во 2018 година во Старбакс во Филаделфија, што доведе до масовни протести.

Нејзиниот колега, Афроамериканец, не добил отказ.

Поротата пресуди дека расата била фактор за отпуштањето, што ги прекршило законите за антидискриминација, објави телевизијата CBS, американскиот партнер на Би-Би-Си.

Старбакс е контактиран за коментар.

Федералната порота во Њу Џерси одлучи дека Старбакс ги прекршила правата на Филипс, како и локалните закони кои забрануваат расна дискриминација, доделувајќи 25 милиони долари казнена отштета и уште 600.000 долари како компензаторна штета.

Инцидентот се случил во Старбакс во Филаделфија во 2018 година, кога на еден од двајцата Афроамериканци кои чекале во продавницата наводно не му било дозволено да оди во тоалет бидејќи не купил ништо.

Мажите, Рашон Нелсон и Донте Робинсон, рекоа дека дошле во Старбакс на деловен состанок и дека чекаат некого.

Кога тие одбиле да заминат, персоналот наводно повикал полиција, која им ставила лисици на мажите и ги извела од Старбакс.

Нивното апсење беше снимено од случајни минувачи и споделено на социјалните мрежи, што доведе до протести и затворање на сите 8.000 локации на Старбакс на еден ден.

Дополнително, компанијата потоа организираше вработените да посетуваат обуки за непристрасно однесување на работното место.

Филипс, тогаш регионален менаџер, добила отказ, додека афроамериканскиот менаџер на барот во кој се случил инцидентот не ја изгубил работата, наведува Си-Би-Ес.

Пред четири години, Филипс го тужеше Старбакс за, како што рече, неправилно отпуштање и неправедно казнување на белци како неа како одговор на апсењата.

Нејзините адвокати тврдеа дека менаџментот на компанијата бара „жртвено јагне“ за да и покаже на јавноста дека направила нешто по инцидентот.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.