Јапонската влада објави извештај во кој открива дека меѓу илјадниците луѓе насилно стерилизирани според законот за евгеника се и деца на возраст од девет години.

Активистите во Јапонија жестоко реагираа на владиниот извештај во кој се открива дека меѓу илјадниците луѓе насилно стерилизирани според законот за евгеника, кој не беше укинат дури во 1990-тите, има и деца на возраст од девет години.

Извештајот од 1.400 страници, поднесен во парламентот оваа недела, детализираше како меѓу 1948 и 1996 година околу 16.500 луѓе биле оперирани без нивна согласност според законот, кој имал за цел „да го спречи раѓањето на неквалитетни потомци… и да ги заштити животот и здравјето на мајката“.

Повеќето од жртвите биле жени.

Уште 8.000 луѓе дале согласност, речиси сигурно под принуда, додека речиси 60.000 жени абортирале поради наследни болести.

Долгата кампања на жртвите за компензација го истакна лошото постапување од страна на јапонската држава кон лицата со попреченост и хронични состојби во периодот по Втората светска војна, пишува Гардијан.

Во 2019 година пратениците усвоија закон со кој на секоја жртва ѝ се нуди компензација од Владата во износ од 22.800 американски долари, што, според активистите, е срамно за страдањата што ги доживеале жртвите. Рокот за пријавување на уплатата истекува во април 2024 година, но до денес само 1.049 ја добиле таа сума, пишуваат медиумите.

Досега четири судови пресудиле во корист на жртвите, но други застанале на страната на владата, сметајќи дека 20-годишниот рок на застареност е поминат. Адвокатите тврдеа дека жртвите премногу доцна дознале за природата на нивната операција за да го испочитуваат законскиот рок за барање компензација.

Германија и Шведска имаа слични мерки, но оттогаш им се извинија на жртвите и обезбедија компензација. Законите на двете земји беа укинати неколку децении пред законите на Јапонија.

Во извештајот се наведува дека стерилизацијата според сега веќе непостоечкиот закон за евгеника, кој им дозволуваше на властите да процесираат лица со интелектуална попреченост, ментални болести или наследни нарушувања за да се спречи раѓањето на „инфериорни“ деца, беше услов за прием во некои социјални институции или за брак.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.