Реализиравме 70 проценти за една година од она што сме го ветиле дека ќе го реализираме за 4 години, вели Орце Ѓорѓиевски, градоначалник на општина Кисела Вода во гостување во емисијата „Што не е јасно“ на телевизија Алфа, и потенцираше дека преку работа мора да ја оправда довербата и поддршката која што ја добил од граѓаните на локалните избори.

Јас сум добил поддршка од народот и морам да ја оправдам нивната доверба и морам да му бидам на моите сограѓани потпора. Не смеам да си дозволам да оставам дечиња да не се хранат во школо, не можам да оставам граѓаните да смрзнуваат преку зима, јас знам дека не е популарна мерката субвенција на дрва, дека загадуваат и сум свесен за истото, но јас не може да ги оставам граѓаните да смрзнуваат и токму затоа го направивме целиот овој сет на мерки. Да не заборавам да кажам дека за прв пат во општина Кисела Вода секое прваче доби ранец со опрема, можеби не е многу но со оглед на економската ситуација каква е, значајна е и мала помош за граѓаните – додаде тој.

Да сте градоначалник не значи само да ги решавате инфраструктурните проблеми, не значи само имате организација на настани, многу значи кога ќе успеете стандардот на своите граѓани, освен преку привлекување на инвестиции и нови работни места, туку и на ваков начин социјално да ги помогнете своите сограѓани, рече Ѓорѓиевски.

Во однос на обвинувањата од страна на СДСМ дека ништо не е сработено во Кисела Вода, Ѓорѓиевски нагласи дека не гледа оправданост и здрава логика во ваквите изјави, како и дека доколку владејачката СДСМ се фокусираше на решавање на проблемите на граѓаните, немаше сега државата да е во ваква катастрофална состојба.

Не гледам оправданост во тие изјави, ниту пак вистини или здрава логика, но тоа е СДС изминатите години додека управуваат со државата. За жал се фокусираат на се друго, освен да се фокусираат на реализација на проекти односно на она за што тие биле избрани и им била дадена шанса од нашите граѓани. Доколку помалку се занимаваа со вакви приказни и сценарија кои ги прават претпоставувам во некој подрум на Бихаќка, а многу повеќе ставеа акцент и фокус на проблемите на граѓаните и државата во целост, мислам дека ќе бевме многу подобро држава денес, а не да се наоѓаме во состојба во каква што се наоѓаме – дециден е Ѓорѓиевски.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.