Министерот за надворешни работи, Бујар Османи, во својство на иден претседавач со најголемата Организација за безбедност и соработка во Европа – ОБСЕ и во својство на актуелен претседавач со групата Медитерански партнери за соработка на ОБСЕ, оствари средба со Министерот за надворешни работи на Арапска Република Египет, Самех Хасан Шукри Селим, во Каиро.

 

На средбата, беа констатирани традиционално добрите пријателски односи меѓу двете држави, како на билатерален, така и на мултилатерален план, при што беа разменети и мислења за натамошен развој на севкупната соработка.

 

Воедно, министерот Османи го информираше соговорникот за приоритетните цели на Македонија во рамки на претседавањето со ОБСЕ во 2023 година, разговараа за интензивирање на соработката со групата медитерански партнери особено дека руската агресија врз Украина и обременетото геополитичко опкружување уште повеќе ја истакнуваат важноста на Медитеранските партнери, како уникатен аранжман што го нуди ОБСЕ за размена на добри практики, дијалог и споделување  искуства.

 

Исто така Османи истакна: „Во Египет гледаме партнер во унапредувањето и спроведувањето на Медитеранската агенда на ОБСЕ и земја на која може да сметаме во справувањето со денешните и иднините глобални безбедносни предизвици“.

 

Министерот потенцира дека Македонија како земја која индиректно е поврзана со Медитеранот, има посебен интерес за интензивирање на соработката и комуникацијата со сите земји од Медитеранот. „Токму на наша иницијатива, овогодинешната медитеранска конференција на ОБСЕ се одржа во Јордан, со што после седум години, оваа конференција повторно се врати кај медитеранските партнери„ рече Османи.

 

Соговорниците разменија мислења и за актуелните меѓународни прашања и безбедносните предизвици, како и за надворешно-политичките приоритети и состојби во непосредното опкружување на двете земји.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.