Министерот за надворешни работи на Република Македонија, Бујар Османи, се сретна со специјалниот пратеник на Обединетото Кралство на Велика Британија и Северна Ирска, надлежен за Западен Балкан, Сер Стјуарт Пич, кој е во прва работна посета на нашата земја, соопшти МНР.

Соговорниците разменија мислења за актуелните внатрешно – политички состојби во земјава, но и во регионот, како и за можностите за соработка со Обединетото Кралство за темите од заеднички интерес меѓу двете земји.

Османи го запозна специјалниот пратеник Пич за спроведувањето на реформите од европската агенда, со посебен акцент на обновениот дијалог со соседна Бугарија и воспоставувањето на солидна основа за јакнење на довербата и соработката во клучните сектори од интерес и унапредувањето на добрососедските односи.

Двајцата соговорници се осврнаа и на безбедносните предизвици со кои се соочува Регионот на Западен Балкан. Притоа, специјалниот пратеник Пич ја реафирмираше силната посветеност на Обединетото Кралство во Регионот и неговата улога во процесот на одржување на безбедноста и стабилноста на Западниот Балкан.

 Традиционалното пријателство и партнерство меѓу Македонија и Обединетото Кралство во изминатите три децении се рефлектира преку интензивен политички дијалог и одлична трговска и секторска соработка, коja ќе се надградува понатаму со можностите кои ги нуди Билатералната Спогодба за трговија, партнерство и соработка меѓу нашите две земји. Постои висок интерес за јакнење на силните трговски релации, при што Обединетото Кралство продолжува да биде нашиот втор најголем трговски партнери еден од најголемите странски директни инвеститори во нашата земја.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.