Претседателот Стево Пендаровски денеска на свечена церемонија во Кабинетот на Претседателот го додели признанието „Повелба на Република Македонија“ на три организации и на четири личности кои со нивната работа и посветеност дадоа огромен придонес за социјализација и остварување на човековите права и слободи на лицата со попречености, за помош и поддршка на обесправените и угнетените, за грижа и воспитување на децата, за подигање на свеста за ракот, за унапредување на родовата еднаквост, за подобрување на меѓуетничките односи, како и за афирмација на нашата земја на меѓународно ниво.

Претседателот Пендаровски го додели признанието „Повелба на Република Македонија“ на „СОС Детско Село“, на Центарот за балканска соработка „ЛОЈА“, на Движењето „Полио Плус“, на Биба Додева, на Ленче Здравкин, на Савка Тодоровска и на Ристо Донев.

Во своето обраќање претседателот Пендаровски посочи дека е препознатлива улогата и значењето на граѓанските организации, како и на поединци кои преку работата во нив, но и самостојно, придонесоа за македонската демократија и македонското општество. Тој истакна дека без силен и развиен граѓански сектор не е можна успешна и демократска Македонија и изрази надеж дека денешниот настан ќе претставува дополнителна мотивација за сите активисти во невладините организации, но и за бројни поединци кои секојдневно прават добри дела. Претседателот Пендаровски им честиташе на добитниците и им се заблагодари за се што досега имаат направено и порача да останат и понатаму посветени на благородната кауза.

Освен квалитетот на трите основни столба на државата, законодавната, судската и извршната власт, репери за демократската зрелост и просперитет на едно современо и развиено општество, се слободата на медиумите и активноста на граѓанските организации. Невладините организации се своевиден индикатор за благосостојбата на заедницата, катализатор на социјалните процеси, заштитник на правата и слободите на човекот и на различните заедници и групи во општеството.

Преку нивната волонтерска работа, меѓу другото, до израз доаѓаат солидарноста, хуманоста, грижата за здравјето на луѓето, поддршката за развојот на културата и уметноста, за напредокот на заедницата на локално, регионално и државно ниво и создавањето можности и механизми за напредок на граѓаните, но и на целата држава.

Уште на самите почетоци од процесот на демократизација кај нас во раните 1990-ти, освен оформувањето на трите споменати гранки на власта, беа поставени и основите за развој на граѓанскиот сектор. Овој процес често беше оптоварен со идеолошки предрасуди, недоречена законска рамка, несоодветна финансиска и институционална поддршка.

За жал, имавме и периоди кога сосема неправедно граѓанските организации беа цел на непринципиелни напади, кога постоеше атмосфера на сомничавост и погрешни стереотипи за нивната работа и нивните цели. Но, по повеќе од три децении независност крајниот ефект е дека имаме бројни невладини организации – активни, со други зборови,  солиден граѓански сектор кој делува и како коректив на државата, но и како рамноправен партнер кој нуди услуги и активности на оние наши граѓани на кои тоа им е најпотребно.

Препознавајќи ја улогата и значењето на граѓанските организации, како и на поединци кои преку работата во нив, но и самостојно, придонесоа за македонската демократија и македонското општество, денес имаме можност на мал дел од нив да им се заблагодариме доделувајќи им Повелба на Република Македонија.

СОС Детско село е пример за грижа за децата во ризик и нивна поддршка, преку семеен модел за алтернативна грижа, како и преку реализирање на програми за социјална превенција. Со професионалната грижа за децата без родители „СОС Детско село“ постави највисоки стандарди на воспитание и образование, како дел од глобалната мрежа на „СОС Детско село“ која е активна во 135 држави и територии во светот.

Центарот за балканска соработка, „ЛОЈА“ интензивно го промовира мултикултурализмот и меѓународната соработка, етаблирајќи се во една од најактивните македонски невладини организации. Благодарение на нејзините програмски содржини голем број на млади луѓе се стекнаа со специфични вештини и знаења и учествуваа во меѓународни проекти и размена на искуства.

Движењето против хендикеп „ПОЛИО ПЛУС“ отвори нови перспективи во поддршката на лицата со посебни потреби, работејќи на нивната социјализација, на добивањето на самодоверба и пронаоѓање на соодветно место и улога во општеството.

Борбата со ракот на дојката е главниот приоритет на БОРКА чија претседателка Биба Додева со својот неуморен ангажман, упорност, посветеност и желба за подобрување на животот на заболените од рак од дојка го задолжи нашето општество.

Ленче Здравкин пак со својата несебична хуманитарна дејност покажа дека нема граници кога е во прашање човекољубието и помагањето на сите оние кои се далеку од своите најблиски и на кои им е потребна грижа и поддршка.

Кога се зборува за рамноправноста на жената и нејзината улога во општествените процеси или за организациите кои се занимаваат со оваа проблематика, не е возможно да го одминете името на Савка Тодоровска која со својата долгогодишна импозантна работа постави највисоки стандарди на активист и лидер за женски права.

Ристо Донев ни покажа дека ако се има желба, волја и истрајност не постојат физички бариери кои можат да ве спречат да постигнувате големи успеси во животот. Тој е редок пример на непоколебливост, мотивираност и навистина претставува инспирација за сите наши граѓани.

Дозволете на крајот од моето денешно обраќање, пред да преминеме на доделување на повелбите, уште еднаш да истакнам дека без силен и развиен граѓански сектор не е можна успешна и демократска Македонија. Се надевам дека денешниот настан ќе претставува дополнителна мотивација за сите активисти во невладините организации, но и за бројните поединци кои секојдневно прават добри дела.

Им честитам на добитниците, ја користам оваа прилика да им се заблагодарам за се што досега имаат направено, да ги замолам да останат и понатаму посветени на оваа благородна кауза и да порачам на сите останати, на сите нас – да се угледаме на нив, за наше добро, рече Пендаровски во своето обраќање.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.