Министерот за образование и наука Јетон Шаќири и амбасадорката на Соединетите Американски Држави во Македонија Анџела Агелер денеска потпишаа меморандум за продолжување на имплементацијата на Фулбрајт програмата за академска размена.

Двете страни ја согледуваме корисноста од Фулбрајт. Размената на знаења и искуства е секогаш добредојдена и за САД како водечка земја во светот во многу области и по многу параметри, а особено за Македонија како земја во развој, која се труди да ги следи глобалните образовни и научни трендови и стандарди“, изјави министерот Шаќири.

Интересот за студиски или истражувачки престој во САД е голем, затоа што секоја година околу 40-тина американски универзитети се рангираат меѓу најдобрите 100 во светот. Годинава има можност за поголем број партиципиенти споредбено со изминатите години, со оглед на тоа што е зголемено финансиското учество во програмата.

Меморандумот за разбирање што Стејт департментот на Соединетите Американски Држави и Министерството за образование и наука го потпишуваат денес, во основа е за две работи: образование и разбирање. Со зголемување на својот придонес во програмата Фулбрајт од 150.000 на 260.000 долари, Министерството инвестира во луѓето и иднината на Македонија“, нагласи амбасадорката Агелер, додавајќи дека од 1991 година, повеќе од 350 граѓани ја искористија можноста да студираат во Соединетите Држави преку програмите Фулбрајт, а потоа се вратија во матичната држава за да помогнат во градењето поздрава економија и подобар животен стандард.

Посочувајчи дека алумни на Фулбрајт денес се активни во владата, академијата, науките, финансиите и речиси секој сектор од општеството, амасадорката Агелер наведе дека и повеќе од 270 Американци ги продолжиле академските определби овде и се вратиле во Соединетите Држави со новооткриено разбирање за улогата и вредноста на Македонија во Европа и важноста на нашите билатерални односи.

Министерот Шаќири потенцираше дека вложувањата во образованието и науката немаат алтернатива а Соединетите Американски Држави остануваат еден од најголемите поддржувачи во заложбите на државата да се интегрира во развиениот свет.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.