Денеска вицепремиерот за европски прашања Бојан Маричиќ оствари средба со специјалниот претставник на Обединетото Кралство за Западен Балкан, Лорд Стјуарт Пич, на која разговараа за текот на преговорите и идните планови на Македонија на патот кон ЕУ, како и за политичките случувања во регионот.

 

На состанокот беше потврдено од страна на британските специјален претставник за Западен Балкан, Лорд Стјуарт Пич, дека Обединетото Кралство продолжува да дава поддршка на ЕУ интеграција на Западен Балкан, со очекување Македонија да го забрза процесот на преговори со ЕУ, бидејќи и Маричиќ и Пич се согласија дека секое кочење на евроинтеграцијата ќе значи простор за мешање на трети страни.

 

Вицепремиерот укажа дека Македонија припаѓа на заедницата на европски вредности и ја посочи важноста на политичката посветеност која ја имаме од Обединетото Кралство на патот кон ЕУ, како и севкупната поддршка во нашите демократски и реформски процеси.

 

Соговорниците ја нагласија важноста од соработката и постојаната комуникација меѓу сојузниците и искрените пријатели како што се Македонија и Обединетото Кралство, особено во сегашниот сложен геополитички момент.

 

Како НАТО партнери и сојузници на патот кон ЕУ Маричиќ и Пич кажаа дека и Македонија и Обединетото Кралство имаат иста цел и заеднички работат регионот да успее во пристапните преговори за краток временски период и да ја забрзаме интеграцијата, како што кажа Маричиќ „со исполнување на обврските и задачите од Поглавјата 23 и 24, односно во делот на владеењето на правото, борбата против организираниот криминал и корупцијата, на што Владата е целосно фокусирана“.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.