Со претставата „Брачна комедија“ на театарот „Сцена Маска“ од Република Србија, вечерва ќе започне Програмата на вториот интернационален фестивал на дуодрама „Бранко Ѓорчев“, во Центарот за култура „Ацо Ѓорчев“, информираше претпладнево неготинскиот градоначалник Горан Стојанов.

– Пред почетокот на претставата, официјално ќе биде отворено овогодишното издание на овој театарски фестивал, кој има натпреварувачки карактер и е единствен од ваков вид во земјата, соопшти Стојанов.

Тој појасни дека, инаку, претставата „Брачна комедија“ e комичен приказ на начинот на функционирањето и темите кои ја следат секоја брачна заедница.

– Брачна двојка излегува во новоотворениот ресторан да прослави седумнаесет години брачен живот. Преку дејствието дознаваме дека имаат шест деца, две нејзини деца од првиот брак, две негови деца од неговиот прв брак и нивните две деца од нивниот брак. За време на вечерата се отвораат теми за кои не е планирано да се разговара таа вечер, свекрва и снаа, деца, но и односот меѓу маж и жена во бракот и машко – женските односи и правата на жените и мажите, до желбата за развод, сподели градоначалникот.

Режисер на претставата е Иван Томашевиќ, а костимографијата е на Селена Младеновиќ.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.