За време на фестивалот „Друга приказна“  во просторот „КСП Центар – Јадро“ во Скопје, Милица Дукиќ ќе понуди отворена работилница за сите заинтересирани. Учесниците ќе имаат можност да ги видат и испробаат нетрадиционалните техники на везење на 31.8.2024 (сабота) | 12.00 до 17.00 часот.

Секој што ќе се вклучи ќе биде препознаен како ко-креатор на уметничкото дело, а за возврат ќе има бесплатна работилница со кафе и освежување. Милица ќе демонстрира како современите техники на вез може да се користат на поекспериментален и послободен начин во споредба со традиционалниот пристап.

За оваа работилница не е потребно предзнаење, а грешките се охрабруваат како дел од процесот на учење, промовирајќи послободен пристап кон работата. Бидејќи везот е бавен процес, ни дава можност за разговор на различни теми, при што информациите од весниците често служат како двигатели на разговорот.

Наместо да работи сама во затворено студио, Милица одбира да го сподели своето искуство со сите оние кои се заинтересирани за она што таа го работи, со што го изложува својот работен процес, создавајќи простор за средби, дружење, нови контакти и потенцијални нови пријателства.

* * *

Фестивалот „Друга приказна“, кој оваа година се одржува по деветти пат, претставува значаен културен настан за македонската литературна сцена, каде се дава простор на помалите, но не помалку значајни издавачи од Македонија. Преку овој фестивал, тие добиваат можност да ги промовираат своите дела и да се поврзат со автори и издавачи од регионот и светот.

Оваа година, по првпат на новата локација Кафе Станица, фестивалот ќе понуди богата програма исполнета со книжевни разговори, промоции, натпревари и музички настапи, во кои ќе учествуваат десетина странски гости и дваесетина учесници од Македонија. Дел од програмите ќе се одржат во КСП Центар – Јадро и Ла Кања. Особено значајно е што пред само еден месец беше организирана кампања за собирање финансиски средства, која овозможи фестивалот успешно да се одржи и годинава, покажувајќи ја посветеноста на заедницата кон промовирање на независната литература и култура.

Организиран од книгоиздателството „Темплум“, „Друга приказна“ продолжува да биде платформа за дијалог и размена на идеи, поддржувајќи ги гласовите на малите издавачи и автори.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.