Денес со почеток во 20:00 часот во кафе-книжарница Буква во Скопје, ќе биде промовиран романот „Кој го уби Едгар Алан По“ од Владо Јаневски.

Промоторка: Анета Тасова
Извадоци ќе чита: Емилија Тодорова

 

„Кој го уби Едгар Алан По“ е роман лавиринт во кој се испреплетени минатото и сегашноста во мистериозна атмосфера како излезена од досега необјавен ракопис на Кафка. Се работи за приказна во која главниот јунак, писателот Феликс Рејнолдс, додека е во потрага по својот изгубен брат, открива делови од неговиот трауматичен и необичен живот. На тој пат Феликс чувствува потреба да сподели дел од она што го измачува, наместо да продолжи да го закопува во себе, затоа бара помош од психијатарот Груми Блум, кај кого честопати навраќа и, легнат на неговиот кауч, низ бројни сесии се отвора себеси. Психијатарот работи во замок кој доминира над градот каде што живее Феликс и се чини дека со замокот и со нивната земја владеат мистериозни луѓе во црно, познати како кафкависти.

Извадок;
Најмногу внимание ми привлече еден црн куфер, вешто сместен во отвор под работната маса на дедо ми. Изгледаше како некој да го направил отворот по мера на куферот. Бидејќи немав многу време, и не знаев кога повторно ќе можам да влезам во работната соба, решив првин да видам што се крие во него. Очекував вредни предмети, чудни направи, загадочни инструменти. За жал, внатре немаше ништо што на прв поглед можеше да ме фасцинира, освен едно позлатено пенкало, прикачено за бележник со црни кожни корици, куп стари хартии и подебел пожолтен плик. Вниманието ми го привлече нечија белешка за содржината на куферот, оставена на чување на дедо ми. Во белешката пишуваше дека во куферот има романи во ракопис, поезија, писма, фотографии и раскази напишани од Кафка.
„Кафка мора да е еден од оние луѓе во главата на дедо ми,“ си реков.
Најдолу имаше нечиј потпис. Од она што го прочитав во белешката, претпоставив дека потписот најверојатно е на Макс Брод. Тогаш си помислив дека Макс и Кафка можеби не биле само во главата на дедо, туку некогаш во минатото живееле некаде на овој свет.

 

Анета Тасова за романот вели: „Во романот ‘Кој го уби Едгар Алан По‘ постои жесток испреплетен судир помеѓу имагинацијата, интелигенцијата, реалноста, филозофијата, природното и она што можеби личи на природно, како и она што луѓето го нарекуваат лудило, но всушност е само постојано бегање од животот и борба со смртта.“

Владо Јаневски е роден е во Прострање, Македонија. Високо образование стекнал на УКИМ во Скопје. Член е на ДПМ. Живее во Сиднеј. Автор е на романите за возрасни: „Смртта не е крај“, „Мртвите знаат најдобро“ (награда Пегаз за најдобар роман во 2020 г.), „Чудо зад аголот“, „Под друга капа“, „Made in Jabana“; поетската збирка: „На грбот на неповратот“; збирката наградувани раскази: „Нема враќање“. Книгите за деца: „Палавковците Влатко и Емче“, „Луѓето и змејовите“ (наградена бајка). Автор е и на редовниот стрип „Палавковците Влатко и Емче“ во „Колибри“, во весникот „Нова Македонија“. Се занимава и со сликарство, учествувал на ликовни колонии во Македонија. Неговите слики се дел од приватни колекции во повеќе земји во светот.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.