Министерството за култура, денеска го објави Конкурсот за поддршка на стручно усовршување на дефицитарни кадри во областа на културата(дефицитарни кадри во уметностите и во заштитата на културното наследство) за 2024 година.

Грижата за младите уметници и за дефицитарните кадри, како мерка, во својата основа ја покажува комплементарноста помеѓу културата и образованието како сооднос кој неизоставно влијае врз унапредувањето на знаењата и афирмирањето на културата во светот.

Во тој контекст Министерството обезбеди средства во еднократен износ од Буџетот на Македонија за 2024 година, поддршка за  младите уметници што во иднина ќе влијае во подигнувањето на стручниот капацитет на институциите од областа на културата и развојот на овие уметници како професионален кадар, а и секако има значење во однос на намалување на трошоците на нивното доедуцирање и професионална наобразба.

Со овие стипендии, покрај тоа што ќе се обезбеди иднина во дефицитарни области на културата и заштитата на културното наследство, се обезбедува и повисок студентски стандард и грижа за младите идни стручни кадри во областа на културата.

Апликантите не треба да бидат постари од 27 години за прв циклус студии, односно од 30 години  за втор циклус студии, односно од 35 години за трет циклус студии.

Пријавувањето на Конкурсот се врши со електронско аплицирање на Националниот портал за е-услуги: https://uslugi.gov.mk, почнувајќи од денеска 20.11.2023 година во 9:00 часот, заклучно со  ­­­­­­­­­­­­­­­­­22.12.2023 година во 23:59 часот.

За резултатите од Конкурсот, подносителите на пријавите ќе бидат известени во согласност со Законот за културата. За секој поднесен проект, корисникот ќе биде известен по електронски пат. Резултатите од Конкурсот ќе бидат објавени и на веб-страницата на Министерството за култура.

Подетални информации околу критериумите, мерилата врз чија основа ќе се врши оцена на пријавите, потребната документација и начинот на финансирање, можете да добиете на следниот линк: https://uslugi.gov.mk/…/konkurs-za-poddrshka-na…#

За сите дополнителни  информации во врска со Конкурсот, заинтересираните може  да   се  обратат до Министерството за култура на Република Македонија на електронската адреса: [email protected].

 

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.