„Македоника литера“ неодамна ја објави книгата „Научната фантастика во македонската книжевност за деца и млади“ на Јованка Денкова.

Овој труд на Денкова е книга за научната фантастика како феномен во книжевноста, но многу повеќе е книга за научната фантастика во современата македонска книжевност за деца и млади. Поимот и особеностите на научната фантастика, нејзината генеза и карактеристиките, класификацијата во македонската книжевност за деца и младина и преплетувањето на научната фантастика со други книжевни жанрови – се главните тематски подрачја во оваа студија. Освен тоа, анализирани се и десет научно-фантастични книжевни дела од македонските автори  Стојмир Симјаноски, Томе Арсовски, Ристо Давчевски, Велко Неделковски, Михо Атанасовски, Зорица Русевска, Даниел Бибовски и Калина Малевска.

Книгата „Научната фантастика во македонската книжевност за деца и млади“ претставува втор дел (преработен, дополнет и надграден) од докторскиот труд на проф. д-р Јованка Денкова, одбранет во 2008 година на Филолошкиот факултет, при УКИМ во Скопје.

Јованка Денкова (1974, Штип), магистрирала и докторирала на теми од книжевноста за деца и млади на Филолошкиот факултет „Блаже Конески“ во Скопје. Од 2008 година работи на Филолошкиот факултет, при Универзитетот „Гоце Делчев“ во Штип, а била и продекан за настава и декан на истиот факултет. Од 2017 година е редовен професор на Катедрата за македонски јазик и книжевност при Факултетот, а ги предава предметите: Книжевност за деца, Европска цивилизација, Македонска култура и цивилизација и Македонската книжевност во 19 век, како и Литература за деца, Книжевност за деца и млади и Книжевност за деца на Факултетот за образовни науки (УГД, Штип). Автор е на околу двесте научни статии од областа на книжевноста, особено книжевноста за деца и млади, скрипта „Книжевност за деца“ (2011) и практикум „Практикум по книжевност за деца“ (2011) за студентите од прв циклус, како и два електронски учебници за студентите од втор циклус: „Реалистична македонска проза за деца и млади“ (2014) и „Сказновидното во македонската проза за деца и млади“ (2015). Автор е на неколку книги, меѓи кои: „Неколку навраќања кон детството“ (2017), „Чудесното и реалистичното во прозата на Глигор Поповски“ (2020), „Фантастиката во македонската книжевност за деца и млади“ (2021).

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.