Министерката за култура Бисера Костадиновска-Стојчевска вечерва на свеченото отворање на светската детска ликовна колонија „Мал битолски Монмартр“ рече дека оваа манифестација е македонски културен и уметнички бренд, кој го негува и промовира космополитскиот дух на Битола.

„И годинава Малиот битолски Монмартр е средиште каде што младите уметници од земјава и од светот, се запознаваат, се дружат, разменуваат искуства, учат едни за други и за земјите од каде што доаѓаат, рече министерката Костадиновска-Стојчевска, додавајќи дека на овој начин „младите ја развиваат љубовта кон уметноста, ги шират идеите за обединост, за пријателство, за надминување и прифаќање на различностите“.

Министерката Костадиновска-Стојчевска истакна дека за оваа година, проектите на „Мал битолски Монмартр“ добија досега највисока сума на поддршка од 240 илјади денари, од Министерството за култура.

„Министерството за култура секоја година е партнер на „Малиот битолски Монмартр“ и во континуитет финансиски ги поддржува проектите на Детското ликовно студио „Свети Кирил и Методиј“ – Битола“, посочи Костадиновска-Стојчевска.

Таа укажа дека успесите и влијанието што ги има „Малиот битолски Монмартр“ се влог и поттик за Министерството за култура за натамошна засилена поддршка на фестивалот на кој победуваат децата, нивната искреност и креативнот.

Министерката на платото „Монмартр“, во старата битолска чаршија, им честита на сите учесници, домашни и странски, како и на добитниците на Гран При наградата, од Кина, изразувајќи уверување дека ова ќе биде „уште едно незаборавно издание на „Малиот битолски Монмартр“,  од каде што ќе се родат трајни пријателства“.

 

Денеска се одбележуваат 55 години од основањето на Детското ликовно студио „Свети Кирил и Методиј” Битола. На „Монмартр“ годинава ќе присуствуваат 20 делегации со над 120 учесници од Кина, Индија, Романија, Полска, Словачка, Израел, Турција, Бугарија, Албанија, Србија, Босна и Херцеговина, Хрватска, Црна Гора, Македонија и други.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.