Во Сули ан во Старата скопска чаршија во рамки на Скопско лето вечерва во 20.30 часот ќе биде изведена „Вилицата на Ибен Бајерс“ од Филип Грујиќ во режија на Борис Василески. Ова е дипломска претстава на Василевски, која премиерно беше изведена на 29 јуни во Македонската опера и балет.

„Вилицата на Ибен Бајерс“ сведочи за извонредниот подем и трагичниот пад на Ибен Бајерс, човек обземен од амбиции и заробен од смртоносна привлечност. Така, со возбудлив приказ на ненаситната потрага на еден човек за моќ, оваа претстава навлегува во вистинската приказна за протагонистот, харизматичен индустријалец чиј живот добива судбоносен пресврт кога ќе наиде на моќен напиток.

Со секој наелектризиран момент, претставата го сплетува возбудливото искачување на Ибен, неговите извонредни триумфи и темнината што се крие зад неговата навидум непобедлива аура.
Општествениот коментар на делото се зајакнува уште повеќе со појавата на Radium Girls кои паралелно со приказната на Ибен, ја раскажуваат и својата приказна обоена во црно од зелениот еликсир.

„Вилицата на Ибен Бајерс“ е застрашувачко истражување на човечкиот дух, што ги истакнува опасностите од неконтролираната амбиција и кревкоста на нашето постоење – сплет на хибрис и трагедија кои даваат одговор на многу навидум едноставни но сепак комплексни човекови дилеми.

Актерската екипа: Марјан Наумов, Гоце Андонов, Благојчо Стојанов, Ава Хусеини, Томислав Давидовски, Катерина Јовановиќ, Ана Грамосли, Јанка Лефкова.

Продуцент на претставата е Андреа Маркоска, драматург Стефан Миленков, костимографијата е на Марта Дојчиновска, сценографијата е на Ненад Тонкин и музиката е на Сашко Костов.

 

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.