Меѓународниот саем за енергетика и технологија – ЕНЕРГО ТЕХНОМА 2024, денеска ги отвори вратите за посетителите во Арената „Борис Трајковски“. Саемот официјално го прогласи за отворен г-ѓа Сања Божиновска, Министер за енергетика, рударство и минерални суровини, а свои поздравни обраќања имаа и г-дин Изет Меџити, Прв заменик претседател на Владата и министер за животна средина и просторно планирање и Даниела Глигоровска, Генерален директор на Скопски саем.
„Со овогодинашниот слоган ‘Вклучи одржлиуви навики’, ставен е акцент на важноста на успешната енергетска транзиција кон зелена енергија, што всушност е наша долгорочна цел за енергетската иднина на Македонија. Настаните како Енерго Технома се исклучително важни на патот кон обезбедување енергетски одржлива и ефикасна држава. Потенцијалот за обновлива енергија во нашата земја е огромен, а една од задачите на Министерството за енергетика и рударство е создавање услови, кои поттикнуваат иновации и напредок во овој сектор“, истакна министерката Божиновска.
Првиот заменик претседател на Владата и министер за животна средина и просторно планирање, Изет Меџити изрази задоволство што е дел од манифестација, која повторно се организира по подолг период.
„Се радувам што повторно се организира оваа манифетација, бидејќи ваквите средби се одлична можност за претставување на индустриското стопанство и најновите достигнувања во областа на технологијата кај нас и во регионот. Нашата определба како Министерство и како Влада за зелена трансформација, како една од важните цели од европскиот зелен договор бара зајакнување на ефикасната употреба на ресурсите, со преминување во чиста циркуларна економија, враќање на биодиверзитетот и намалување на загадувањето“, рече Првиот заменик претседател на Владата, Меџити.
Генералниот директор на Скопски саем, Даниела Глигоровска посочи дека Саемот Енерго Технома повторно се организира по шест години, овојпат со малку поинаков фокус кон енергетиката и технологијата, кои ја одразуваат динамиката на современите предизвици и можности во индустријата.
„Оваа саемска манифестација претставува клучен настан од областа на енергетиката и техничките иновации и претставува важна платформа за размена на знаења, искуства и технологии, кои го обликуваат нашиот регион и пошироко. Саемот Енерго Технома не е само изложбен простор за најновите производи и услуги, туку претставува место каде што се отвораат нови перспективи и се градат партнерства. Оваа манифестација е одраз на нашата заедничка заложба за иновативни решенија, одржливост и унапредување на енергетскиот сектор, кој е од суштинско значење за економскиот развој и квалитетот на животот во нашето општество“, истакна Глигоровска.

ЕНЕРГО ТЕХНОМА оваа година е посветен на зелени решенија и иновативни технологии, со цел да ги истакне најновите технолошки достигнувања и стратегии за справување со глобалните енергетски предизвици. За време на трите дена од саемот, ќе се претстават повеќе од 30 водечки компании од Македонија и од регионот, кои ќе ги претстават своите најсовремени производи, технологии и услуги, фокусирани на обновливи извори на енергија, енергетска ефикасност, автоматизација и модерни технолошки процеси.

Работно време на саемот е од 10.00 до 18.00 часот, во трите дена на саемот од 29ти до 31ви октомври, во Арена Борис Трајковски.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.