Косовската полиција упадна денеска во објектот на паралелната општина Србица (Скендерај), која се наоѓа на северот од државата, населен со мнозинско српско население, јави дописникот на МИА од Приштина.

Заменик-директорот на полицијата за северниот регион, Ветон Ељшани изјави за медиумите дека, во координација со државниот обвинител, е преземана акција за затворање на оваа паралелна српска општина.

„Денеска при полициски проверки на терен дојдовме до информација дека паралелната општина Србица е активна на територијата на Северна Митровица. Се консултиравме со обвинителот кој го има случајот со паралелните општини на север и во координација со него влеговме во оваа зграда и се занимаваме со случајот. Најверојатно ќе биде затворена“, рече Елшани.

Косовскиот портал на српски јазик КоССев објави фотографии од местото на настанот, на кои се гледа дека во објектот се присутни и припадници на Мисијата на Европската унија за владеење на правдата, ЕУЛЕКС.

Пред една недела беа затворени и други четири паралелни српски општини кои беа функционални на косовскиот север – Северна Митровица, Звечан, Лепосавиќ и Зубин Поток.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.