Делегациите на Белград и Приштина во Брисел договорија патоказ за имплементација на енергетскиот договор.

Со задоволство можам да објавам дека Белград и Приштина штотуку усвоија енергетски договор. Ова е голем чекор напред, напиша Лајчак.

Се огласи и вицепремиерот на Косово и главен преговарач на косовската страна во дијалогот со Србија, Бесник Бисљими, кој рече дека е постигнат енергетски договор со Србија и дека oд сега на општините во северно Косово ќе им се наплаќа за струја.

Бисљими на Твитер напиша дека денеска во Брисел е одобрен Патоказот за спроведување на енергетскиот договор во согласност со регулаторниот систем на Косово.

Конечно, го одобривме Патоказот за спроведување на енергетските договори од 2013 и 2015 година. Ова овозможува фактурирање на електрична енергија во четири општини во северно Косово, во согласност со законите и регулаторниот систем на Косово, рече тој.

Директорот на Канцеларијата за Косово и Метохија, Петар Петковиќ, утрово во Брисел се сретна со специјалниот претставник на ЕУ, Мирослав Лајчак, во рамките на новата рунда од дијалогот меѓу Белград и Приштина на техничко ниво.

Претходно Лајчак во зградата на Европската служба за надворешни работи имаше билатерална средба со главниот преговарач на Приштина, Бесник Бислими.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.