Македонија е една неискусна селекција која игра Европско првенство по пауза од десет години, а воведните два меча против великаните Франција и Холандија дадоа доста одговори за тоа која е реалната сила на овој тим кој го предводи Љубомир Савевски.

Селекторот е свесен дека Македонија е далеку од ракометниот крем во женска конкуренција и пред сите претстои голема работа, но пред да се насочат сите кон иста цел, следи клучниот меч на ова Европско првенство кое се игра и во Скопје.

Македонија утре ќе ги одмери силите со Романија во директен дуел за пласман во слендата фаза, а капитенот Сара Ристовска побара борба од своите соиграчки во сите 60 минути, нешто што не беше случај со Франција и Холандија.

Пред се, сакам да им се заблагодарам на сите луѓе кои доаѓаат на трибините да не поддржат. Ние сме млада репрезентација без искуство на вакви натпревари, не сме искусиле вакви турнири. Едноставно правиме многу грешки, искуството си го прави своето и на првите два натпревари самите го креиравме резултатот во полза на противникот. Претрпевме два порази, но сега следи мечот кој е најважен.

 

Верувам дека до крајот на денот ќе направиме целосна анализа, треба да се насочиме, да имаме поголема верба во себе и да се настроиме како семејство. На првите два меча имаше борбеност, но немаше заедништво. Против Романија ни е последна шанса да се покажеме. Јас како капитен верувам во себе, верувам во оваа селекција и се надевам дека ќе се радуваме сите по мечот со Романија, изјави Сара Ристовска.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.