Предновогодишен концерт на воените оркестри од aрмиите на Македонија, Албанија, Словенија и Хрватска ќе се одржи вечерва во Домот на Армијата во Скопје, соопшти Министерството за одбрана.

Мотото на концертот е „Армиски aкорди, новогодишна прослава на пријателството преку звуците на четири армии на НАТО“.

Ќе се изведе репортоар од различни нумери од познати светски автори, како Боб Мерил и Наохиро Иваи, како и повеќе нумери од познати композитори од земјите на оркестрите.

На концертот, како што информира Министерството за одбрана, се очекува да присуствуваат министерката за одбрана Славјанка Петровска, началникот на Генералштабот, генерал-потполковник Васко Ѓурчиновски, министри во Владата, пратеници во Собранието.

Ќе присуствуваат началникот на Генералштабот на Вооружените сили на Албанија генерал-мајор Арбен Кинѓи, кој е во официјална посета на земјава, дипломатскиот и воено-дипломатскиот кор акредитирани во Република Македонија, претставници на верските заедници, поранешни министри за одбрана и поранешни началници на Генералштабот на Армијата, активни и пензионирани генерали на Армијата, припадници на Министерството за одбрана, Генераштабот и командите на Армијата и други гости.

Воениот оркестар на Армијата на Македонија во духот на соработката со оркестрите од сојузничките армии во регионот веќе неколку години одржуваат заеднички концерти.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.