Овој викенд (недела, 3 април 2022) во организација на Boiling Point и Q Rec, ќе се одржи втора кумановска берза на винили во Valhalla bar. Првото издание се одржа пред 2 години, а лани планираното издание беше откажано поради воведувањето ригорозни протоколи за јавни настани.

Почетокот е планиран точно на пладне (12 часот) на локацијата карши Театар „Куманово“. Ќе бидат присутни низа дилери на плочи: Блаже Томески-Биџо од Прилеп, скопјанецот Даниел Ковачев и неуморниот Тошо Филиповски. Diehard Records ќе ги донесат нивните изданија на винил, сосе аудиокасетите и ЦД-ињата, а MATRACOOKIE ќе ги донесат нивните касети. Ќе ги има и изданијата на Sixtynine Records и кумановската етикета Kran Records. Од Србија, пак, ќе дојдат нишлиите Зоран Цекиќ (Vintage Shop), Млаѓан Коцановиќ, Vintage Shop и Владимир Вељковиќ-Веле. Додатни српски дилери ќе се Борко Бојовиќ (Yugovinyl) од Белград, зрењанинскиот Демаго и Crazy Vinyl oд Крагујевац.

За музичката програма ќе бидат задолжени Коushiro & Пуца Череп (Куманово) и DJ Ceka (погоре спомнатиот Зоран Цекиќ од Ниш), а со звучен перформанс ќе настапи Fließgewässer од Шпанија.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.