Музичката легенда Лени Кравиц доби ѕвезда на Булеварот на славните во Холивуд.

Пејачот, познат по неговите хитови „Fly Away“, „It Ain’t Over ‘Til It’s Over“ и „American Woman“, беше одликуван за време на церемонијата пред култната кула на Capitol Records. За да го поддржи во одбележувањето на значајниот настан, неговата ќерка Зои го почести со емотивна порака.

„Лени Кравиц, имам задоволство да те познавам долго време“, го започнала својот говор.

„И морам да кажам дека тоа што сум твоја ќерка е една од најголемите авантури во мојот живот. Од кога си млад кога се родив, на многу начини пораснавме заедно. Поминавме низ многу. Видовме многу заедно. Видов како се менуваш на најубави можни начини, видов и како остануваш истата личност поради најважните причини. Ја видов твојата неверојатна посветеност на уметноста. Сè што правиш е израз на љубов. Твојата музика, твоите текстови, твоите настапи во живо, љубовта кон храната, семејството, добрите разговори, глупавите шеги, забавите, танцувањето, доцните ноќни кујнски муабети – ти си личност која апсолутно го голта животот. Ја јадеш секоја трошка и ја лижеш чинијата. Животот е твојата најголема уметност и затоа музиката ти е толку инспиративна и важна. Честитки, ти си ѕвезда“, заклучи Зои.

Оскаровецот Дензел Вашингтон, исто така, се качи на сцената за да му оддаде почит на легендарниот музичар. „Тој е повеќе од пријател, повеќе од брат. Ние сме близнаци, едноставно ние сме слични. Имаме блиски братски односи 30 години. Бог го благослови со неверојатен талент, но и уште повеќе, со неверојатно срце“.

На церемонијата присуствуваа и пејачката и актерка Марла Гибс, актерот Хал Вилијамс, готвачот Волфганг Пак, актерот Ченинг Тејтум, музичарот на Earth, Wind & Fire Вердин Вајт и актерот и музичар Еван Рос.

Кога дојде редот да зборува, Лени Кравиц ја нарече својата ѕвезда „неверојатна чест“ и призна дека тоа што неговата ќерка и Дензел се таму, му значело многу.
„Како тинејџер поминав многу време шетајќи по булеварот Холивуд и гледајќи ги имињата на сите мои идоли“, рече Лени. „Никогаш не сонував да бидам ѕвезда. Обично барав место за да ја поминам ноќта. Но сонував да ја правам музиката што ја сакав и да се занимавам со сопствена работа. Да го видам моето име, Лени Кравиц, трајно врежано на истата улица, по која некогаш сум одел е надреално, неописливо чувство“.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.