Поранешниот руски претседател Дмитриј Медведев изјави во средата дека победата на Доналд Трамп на американските избори е веројатно лоша вест за Украина, но тој рече дека не е јасно колку Трамп може да го намали американското финансирање за војната.

Трамп, републиканец, прогласи победа во претседателската трка во 2024 година, откако Фокс њуз објави дека ја победил демократката Камала Харис, со што направи политички „кам-бек“ по четири години по напуштањето на Белата куќа.

– Трамп има една корисна особина за нас: како деловен човек до срж, тој навистина не сака да троши пари на разни глупави приврзоци, на лоши добротворни проекти и алчни меѓународни организации – објави Медведев, шефот на рускиот Совет за национална безбедност, на неговиот официјален профил на Телеграм.

Тој рече дека украинските власти се меѓу луѓето на кои Трамп веројатно не сакал да троши премногу пари и сугерираше дека украинското раководство ќе стори сé што може за да се утеши откако ќе биде потврдена победата на Трамп.

Прашањето е колку Трамп ќе биде принуден да инвестира во војната. Тој е тврдоглав, но системот е посилен – рече Медведев, пренесува Ројтерс.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.