Македонски
Центарот за управување со кризи предупредува на можно зголемување на водостојот на реките особено во западниот дел на земјава.
Во доцните вечерни часови и за време на претстојната ноќ се очекуваат нови врнежи од дожд претежно во западните делови на земјата каде се прогнозираат количини на врнежи од 15 до 20 литри на квадратен метар. Земјата полека се заситува со влага од претходните врнежи изминативе денови така што можна е реакција на реките во западниот дел на земјата и извесно зголемување на нивниот водостојот, велат од ЦУК.
Како што се наведува во соопштението, зголемување на водостојот доцна во ноќта и утре изутрина може да има на реката Треска, на Црна Река, на водотеците од горниот дел од сливот на река Вардар, како и на реките кои доаѓаат од планинскиот масив Солунска Глава.
Според прогнозите, можни се и краткотрајни врнежи со умерен интензитет кои можат да доведат до брзо зголемување на водостојот на помалите реки и суводолици во западниот дел на земјата, односно на малите реки и суводолиците кои доаѓаат од Шар Планина и од планината Јакупица (масивот Солунска Глава).
Од ЦУК велат дека се можни пообилни врнежи во делови од градските средини, како Тетово и западниот дел на Скопје, а во источниот дел на земјата во текот на денешниот ден не се очекуваат поголеми зголемувања на водостоите.
Центарот за управување со кризи со предупредување до граѓаните за внимателно движење покрај реките и суводолиците во текот на вечерните часови и ноќта.
