Македонски
17 НОЕМВРИ (ПОНЕДЕЛНИК) 19:00 ч.
ДЕНОВИ НА ЈАПОНСКИ ФИЛМ
ИЗНАЈМИ МАЧКА
(Rent-a-Cat/ Rentaneko)
Игран филм, Јапонија
2012, 110 мин. Колор, Блу Реј
Режија: Огигами Наоко (Ogigami Naoko)
Сценарио: Огигами Наоко (OgigamI Naoko)
Улоги: Ишикава Микако, Кусамура Реико, Митцуиши Кен (Ichikawa Mikako, Kusamura Reiko, Mitsuishi Ken)
„Изнајми мачка“ е топла драмедија од 2012 година, напишана и режирана од Наоко Огигами. Филмот премиерата ја имаше на Берлинскиот филмски фестивал во 2012, а во Јапонија се стекнува со култен статус меѓу љубителите на независното кино.
Филмот раскажува за Сајоко, ексцентрична млада жена од 30 години што управува со бизнис за изнајмување мачки на осамени луѓе – идеја инспирирана од вистинска приказна на една од пријателките на Огигами. Нејзиниот живот е мешавина од хаос и тишина – живее во стара куќа со дупки во ѕидовите и срцето, окружена со мачки што се нејзино семејство. Секоја средба со нејзините муштерии е мала приказна, испреплетена со сува духовитост и моменти на тишина што зборуваат повеќе од зборови. Од вдовица што тагува (Реико Кусаура) до бизнисмен оддалечен од сè (Кен Мицуиши). Огигами не брза, нејзините кадри се бавни, исполнети со топли бои и детали создавајќи чувство на мир и меланхолија. Таа раскажува приказна за осаменоста во современа Јапонија, каде модерниот живот често ги оддалечува луѓето. Мачките не се само симпатичен трик; тие се метафора за привремената утеха што ја бараме кога врските не успеваат. Преку нив режисерката дава коментар за осаменоста во модерното јапонско општество, падот на наталитетот, изолацијата на поединците и потребата од привремени врски. Влијанието од Каурисмаки е очигледно во минимализмот и сувиот хумор, на кој Огигами додава јапонски шарм.
Наоко Огигами (Naoko Ogigami), родена 1972 година во Чiba, Јапонија, е режисерка и сценаристка чиј уникатен глас го оформи јапонското независно кино. По дипломирањето на Универзитетот за уметност во Нихон, заминува во САД да студира филм на Универзитетот на Јужна Калифорнија. Нејзиниот пробив доаѓа со Камоме вечера/Kamome Shokudo (2006), приказна за јапонски ресторан во Финска, која го привлече вниманието на меѓународните фестивали. Позната по нежни, хумористични драми што ги слават малите моменти и осамените души, како Меган/Megane (2007), Тоалет/Toilet (2010) и Ситен вез/Close-Knit (2017), често фокусирајќи се на жени и маргинализирани ликови.
