Македонски
Портпаролот на Кремљ Дмитриј Песков, коментирајќи на брифинг за заканата од воведување нови европски санкции против Русија доколку Москва одбие прекин на огнот во Украина, порача дека јазикот на ултиматум не може да се користи за дијалог со Русија.
Јазикот на ултиматум не е соодветен. Со Русија не може да се разговара на таков јазик, нагласи тој.
Песков исто така потсети дека Русија веќе добила слични закани на 10 мај, а тогаш тие исто така им биле претставени „во прилично ултимативна форма“. На тој ден, францускиот претседател Емануел Макрон, германскиот канцелар Фридрих Мерц, како и премиерите на Велика Британија и Полска, Кир Стармер и Доналд Туск, го посетија Киев, каде што за време на преговорите со украинската страна предложија 30-дневен прекин на огнот од 12 мај.
Германската влада соопшти дека доколку Русија го одбие примирјето предложено од Европа и Украина, ЕУ ќе почне со подготовки за дополнителни санкции против Русија.
Рускиот претседател Владимир Путин, пак, обраќајќи им се на новинарите во Кремљ им порача на властите во Киев да ги продолжат директните преговори, кои беа прекинати во 2022 година, без предуслови. Се предлага почеток на дијалог на 15 мај во Истанбул.
Путин исто така напомена дека Руската Федерација претходно во повеќе наврати, (време на Велигден и околу 9 мај), прогласувала примирје, кое властите во Киев и украинските сили постојано го прекршуваа, вклучително и најновото тридневно примирје воведено за време на прославата на 80-годишнината од победата во Големата татковинска војна.
Американскиот претседател ѝ порача на Украина „веднаш да прифати“ разговори бидејќи Западот по нив „барем ќе знае на што е“.
По пораката на Трамп, Зеленски соопшти дека прифаќа и оти лично ќе дојде в четврток во Турција за да преговара со Путин, иако за тој ден веќе има закажано посета на Црна Гора, каде што треба да потпише договор за страатешко партнерство меѓу двете земји.
