Огнен Стефановски го собори државниот рекорд во скок со стап стар 57 години

Атлетска федерација на Македонија

Огнен Стефановски стана првиот македонски атлетичар кој прескокнал со стап четири метри.

На Европското тимско првенство во Марибор, Стефановски оствари резултат од 4,05 метри и со тоа го собори државниот рекорд кој важеше од 1968 година и беше еден од најстарите во македонската атлетика. Сопственик на претходниот најдобар резултат во скок со стап беше 3.90 метри на Владимир Карер поставен во Ливорно во 1968 година.

Светскиот рекорд во скок со стап му припаѓа на Швеѓанецот Арманд Дуплантис, кој неодамна во Стокхолм прескокна 6,28 метри.

Дваесетгодишниот Стефановски, кој е член на скопскиот клуб Делта, е универзален атлетичар, па во Марибор настапува и во фрлање копје и на трката на 110 метри со пречки.