Македонски
Украина ќе има потреба од најмалку 120 милијарди долари за одбраната во 2026 година, додека војната влегува во четвртата година, изјави министерот за одбрана Денис Шмигал.
Тој нагласи дека финансирањето е клучно за одржување на одбранбените линии, производство на дронови и други оружја, зајакнување на противвоздушната одбрана и спречување на понатамошна руска агресија. – Економијата на војната покажува дека ако трошиме помалку од Русија, почнуваме да плаќаме со територии и, пред сè, со животи, изјави вчера Шмигал на годишна конференција во Киев.
Од руската инвазија во февруари 2022 година, расходите на Украина за одбрана значително се зголемија, достигнувајќи над 31% од БДП за армијата. Буџетот за 2025 година предвидува најмалку 63 милијарди долари за одбрана, плус оружје од западните сојузници.
Роксолана Пидласа, претседателка на парламентарната буџетска комисија, изјави дека трошоците за војната растат, при што еден ден од војната во 2025 година чини 172 милиони долари, во споредба со 140 милиони во 2024 година. Овие трошоци ги опфаќаат платите на војниците, оружјето и компензациите за повредените или загинатите.
Украинските власти ги повикаа сојузниците да најдат начини за користење на замрзнатите руски средства за финансирање на Киев. Војната се интензивираше последните месеци, со тешки борби долж над 1.000 километри од фронтот и зачестени руски воздушни напади врз украинските градови. Дипломатските напори за прекин на војната досега не дадоа резултати.
– Додека не се постигне дипломатско решение, мораме да продолжиме да се бориме, а за тоа ни требаат пари. Одбраната има огромна финансиска цена, рече Пидласа.
