Македонски
Во светот на новите технологии, културата добива нова димензија на достапност и инклузивност. Советот за култура, стручното и советодавно тело на Министерството за култура и туризам најави иницијатива за изработка на Стратешка рамка за дигитализација во културата, со цел да се одговори на предизвиците и можностите што ги носи дигиталната трансформација, соопштија од Министерството за култура и туризам.
Дигитализацијата во културата подразбира користење на дигитални технологии за создавање, зачувување, дистрибуција и пристап до културните содржини и уметничките изрази. Оваа стратегија вклучува дигитално архивирање на културното наследство, развој на виртуелни музеи и галерии, како и иновации во користењето на нови медиуми, вклучувајќи виртуелна и проширена реалност.
Дигитализацијата не само што ја зголемува достапноста на културните содржини, туку ги надминува географските и физичките ограничувања, обезбедувајќи им на сите можност за широка афирмација на културното наследство, изјави претсeдателката на Советот за култура, д-р Ганка Цветанова.
Советот нагласува дека системската дигитализација на културата е стратешки приоритет, кој ќе гарантира долгорочно зачувување на културното наследство и ќе го модернизира неговото доживување во современото општество.
Стратешката рамка за дигитализација ќе служи како основа за интегрирање на дигиталните технологии во културните политики, поттикнувајќи нови форми на креативно изразување и поширок општествен ангажман.
Оваа иницијатива е повик за соработка на сите релевантни чинители – културните институции, владините тела, научната заедница и приватниот сектор – со цел да се осигури успешна и одржлива дигитална трансформација на културата.
