Македонски
Во екот на откупот на јагнињата за Велигденските празници, сточарите од Пелагонискиот регион реагираат на, за нив, ниската откупна цена од околу 210 денари за килограм, на неисплатените субвенции за 2024 година и бараат укинување на мерката со која се обврзани 50 отсто од јагнињата да им ги „испорачаат“ на кланичарите.
Тие сметаат дека тоа предизвикува јагнињата да бидат стари и голем дел остануваат непродадени. Сточарите бараат и да им се исплатат субвенциите за минатата година.
Откупната цена на јагнето за нас е ниска. Голем проблем е мерката со која мора 50 проценти од јагнињата да се носат во кланица, а ако не ги однесеме нема субвенции. Цената тие ни ја одредуваат и ние, со ова немаме простор за пазар. Бараме мерката итно да се укине, ако може да ни помогне министерот за земјоделство, за да може, барем, да го предадеме јагнето, оти јагнето е во поодмината фаза и е прерастено. Друг проблем е со исплатата на субвенциите за минатата година. Исплатата беше договорена во февруари, по лозарите да се исплатат сточарите, а сточарите не се исплатени до денес, изјави Боби Бошевски, сточар од Пелагониско.
Според сточарот Кирил Стефановски, околу 70 отсто од јагнињата во Пелагониско се прерастени и неоткупени.
Прерастените јагниња не може да ги извезуваме на италијанскиот пазар. Во други земји, како Албанија, Бугарија може, но не за европскиот пазар. Во Пелагонискиот регион јагне останато дома има околу 70 проценти кое не е продадено и е прерастено. Непродадено јагне има токму поради мерката за да испорачаме 50 насто од јагнињата во кланиците. Сите досегашни напори да наидеме на заедничко разбирање со Министерството не вродија плод, рече сточарот Стефановски.
Откупот на јагнињата за Велигденските празници ќе биде интензивен уште десетина дена.
