Затворањето на Ормускиот теснец би било „економско самоубиство“

Американскиот државен секретар Марко Рубио го предупреди Иран да не го затвора Ормускиот теснец, клучен превозен пат, откако иранските пратеници го поддржаа таквиот потег што веројатно би го нарушил глобалниот извоз на нафта.

Ако го сторат тоа, тоа ќе биде уште една ужасна грешка, рече Рубио денеска, помалку од 24 часа откако САД започнаа воздушни напади врз клучните ирански нуклеарни постројки, што означи голема ескалација во војната меѓу Израел и Иран.

Затворањето на клучниот превозен пат меѓу Иран и Оман, кој е широк околу 55 километри, би претставувало „економско самоубиство“ за Техеран, изјави Рубио за американскиот радиодифузер Фокс њуз.

Тоа би им наштетило на економиите на другите земји многу повеќе од нашите, рече американскиот државен секретар. „Мислам дека тоа би била масовна ескалација што би заслужила одговор, не само од нас, туку и од другите“, додаде тој.

Претходно денеска, иранскиот парламент го поддржа затворањето на Ормускиот теснец, според член на парламентарниот комитет за безбедност.

Сепак, конечната одлука е на врховниот лидер на Иран, ајатолахот Али Хамнеи, кој го има последниот збор за сите стратешки прашања.