Македонски
Во петок на ден 29.08.2025 во 20:30 часот ќе биде свечено затворена (финисаж) во Младинскиот културен центар во Скопје самостојна изложба на ликовна уметница Петра Јовановска под насловот „Кругот е недостапен“.
На изложбата ќе биде присутен претставникот на Амбасада на Р. Чешка г-дин Квјетослав Сулек, конзул, кој и ќе ја затвори изложбата. Уметницата Петра Јовановска осмислува дела создадени во комбинирана техника, користејќи сув печат и акрил, кои се инсталирани во поголеми композиции.
Доминирачка боја во нејзините дела е сината боја, во делата користи минимум боја, што создава впечаток на минимализам. Основен елемент во секое дело е кругот, кој служи како симбол и е клучен за творештвото на Јовановска. Кругот, како форма, не е само визуелен елемент, туку и симбол на континуитетот, бескрајното и циклусите на природата и животот. Оваа форма, која се провлекува низ многу од нејзините дела, претставува еден вид емотивен израз, размислување и одраз на нејзиното сопствено уметничко патување. Во процесот на создавање користи комбинирани техники, при што едната од најважните за неа е сувиот печат, техника која и овозможува да ја нагласи структурата и текстурата на делото, додавајќи дополнителна длабочина и емотивен интензитет на визуелната форма.
Петра Јовановска е родена во Р.Чешка, има завршено Ф.Л.У. во Скопје, смер графика. Петра е ликовен уметник, организатор, куратор и координарор на многубројни ликовни проекти, до сега има реализирано 80 самостојни изложби / Р.Чешка, Р.Македонија, Франција, Словенија, Германија, САД, Полска, Хрватска, Босна и Херцеговина…/голем број од нив во своја организација, има учествувано во над 300 групни изложби, добитник е на бројни награди, има учествувно на многубројни меѓународни ликовни симпозиуми и колонии. Ликовниот проект е поддржан од Министерство за култура и тузирам и Амбасада на Р. Чешка
