Македонски
Изгорено тело на машко лице е пронајдено по гаснењето на пожар што избувнал во круг на фабрика на подрачјето на Гази Баба во Скопје, информираат од Министерството за внатрешни работи.
Пожарот бил пријавен на 13 декември 2025 година во 21:29 часот во СВР Скопје. Според полицијата, огнот зафатил два магацина во индустриски објект, сопственост на М.Р. (46) од Скопје, кои биле изнајмени на други лица.
На местото интервенирала екипа на Бригадата за противпожарна заштита на Град Скопје, која го локализирала и целосно го изгаснала пожарот. Денеска, 14 декември, при вршење увид во еден од објектите, кој под наем го користел М.А. од Скопје, било пронајдено опожарено тело на машко лице.
Надлежните засега не го соопштуваат идентитетот на починатиот, ниту пак причините за настанувањето на пожарот и смртта. Увидот на местото го извршиле полициски екипи и јавен обвинител, а по наредба на обвинителството ќе се вршат дополнителни истражни дејствија и обдукција, со цел да се утврдат околностите под кои дошло до трагичниот настан.
Истрагата е во тек.
