Мицкоски: Aпликацијата м.Услуги ќе ја промени државата од корен

Премиерот Христијан Мицкоски во своето обраќање на Дигиталниот самит на Западен Балкан во Скопје, истакна дека апликацијата м.Услуги (m.Uslugi) е почеток на дигитална револуција што ќе ја промени државата од корен.

Со гордост ја претставуваме апликацијата м.Услуги. Таа е симбол на новата ера – сите документи во еден дигитален паричник, безбедна размена на податоци, потсетник за рокови и обврски, целосна транспарентност и доверба“, рече Мицкоски.

Тој упати посебна благодарност до министерот Андоновски и неговиот тим за, како што рече, „жестоката и напорна работа“ во реализацијата на оваа иницијатива.

Со оваа апликација Македонија прави крупен чекор кон дигитална трансформација, обезбедувајќи модерен, ефикасен и безбеден пристап до јавните услуги за секој граѓанин.

Како што информираат од Министерството за дигитална трансформација, апликацијата е во тест фаза наменета за тестирање со реални податоци. Секој заинтересиран тестер, корисник, програмер може да ја симне на начин опишан во прикачениот документ со QR код и инструкции за инсталирање на апликацијата. По добивањето на мислења од корисниците, финалната прва верзија од апликацијата ќе биде достапна до крајот на годината.

Затоа, ги повикуваме сите заинтересирани ентузијасти да ја симнат, тестираат и дадат коментар за супер апликацијата м.Услуги“, велат од од Министерството за дигитална трансформација.