Урнат некогаш најлуксузниот белградски хотел „Југославија“, ќе се гради деловен и станбен комплекс со два облакодери

Еден од препознатливите симболи на Белград, хотелот „Југославија“ денеска беше до темел урнат, а на тоа место како што претходно беше најавено ќе се гради луксузен деловен и станбен комплекс со два облакодери.

На урнатините на хотелот „Југославија“ има градежни машини кои дробат шут и го товарат во камиони.

Хотелот „Југославија“ беше продаден на аукција на 22 март минатата година по почетна цена од 3.176.997.271 динари, околу 27 милиони евра, а купувач беше МВ Инвестмент како единствен учесник на аукцијата, компанија во сопственост на тимот Милениум.

Првите багери почнаа да ја уриваат зградата на хотелот „Југославија“ во ноември 2024 година и покрај бројните протести на граѓаните кои се спротивставија на уривањето и нарушувањето на амбиенталниот ансамбл на границата меѓу Нов Белград и Земун.