Македонија и Романија

Цветин Чилиманов

Година дена наназад Мајк Бенц е главниот извор на информации за злоупотребите на американската дипломатија и разузнавање што се вршеле во изминатата деценија и пол (од времето на Обама). Благодарение на неговите интервјуа со Џо Роган и Такер Карлсон, како и настапите на мрежите Рамбл и Твитер, светот дозна за вистинскиот карактер на програмите за помош и развој, водени преку УСАИД – организација за која Бенц вели дека е практично помал брат на разузнавачката агенција ЦИА.

Како поранешен дипломат, Бенц е добро запознаен со активностите на американските служби за „промена на режими“, пропагандни операции и организирање обоени револуции, откри огромен број детали од кујните на Вашингтон.

Oбвинувањата вклучуваат сознанија за вмешаноста на ЦИА во шверц со дрога во Азија, користење на мрежите невладини организации кои САД ги финансираат ширум светот за креирање на политичка нестабилност, предизвикување на војната во Украина со двете обоени револуции во оваа земја и упорното (и анти-американско) промовирање на контролата врз социјалните мрежи и слободата на говорот. Една од основните поенти на Бенц е дека ЦИА и нејзината помала сестра УСАИД ја напуштиле историската улога од Студената Војна на борба против комунизмот и сега се блиски и комотно интегрирани со левичарските и зелените партии, а како свој главен непријател ги напаѓаат десничарските политички движења. Ова е неверојатниот пресврт кој се случи во мандатот на Обама, а продолжи и во Трамп 1.0 ерата и секако во мандатот на марионетата Бајден.

Толку интензивно беше свртувањето влево на американската надворешна политика што нормални политички ставови од типот „границите на државата мора да бидат контролирани“ и „илегални доселеници не треба да добиваат социјална помош и да гласаат“ денес се прогласуваат за ставови на „крајната десница“. За време на изборната кампања, ставот на Трамп и Џеј Ди Венс дека не е нормално во град во Охајо со 50.000 жители во рок од неколку години, со помош на невладини организации финансирани од државата да се населат 20.000 луѓе од Хаити, во повеќето етаблирани американски телевизиски станици беше прогласуван за скандал, изблик на расизам и национализам.

Но, да се вратиме на Бенц. Судбината сакаше неговата најзначајна емисија во однос на Македонија да се случи на денот на трагедијата во Кочани. Во неговата емисија на Рамбл, Бенц цитираше повеќе статии за Македонија од периодот на шарената револуција.

Американскиот Стејт Департмент честопати се здружува со Сорос и со Фондацијата Отворено Општество за да ‘промовираат демократија’ во источноевропските земји. Ова најчесто значи напаѓање на националистичките влади и вбризгување на доза социјална, либерална пропаганда преку невладините организации и медиумите финансирани од Запад – честопати со цел да се влијае на изборите во овие држави. Еден пример се извештаите за мешање на УСАИД во изборите во Македонија во 2016та година. Според интернет страницата на УСАИД, од 27 февруари 2012 до 31 август 2016та година, оваа агенција дала 4.8 милиони долари на Фондацијата Отворено Општество – Македонија. Џудишал Воч јави дека, со помош на тогашниот амбасадор на Барак Обама во Македонија, Џес Л. Бејли, американската влада потрошила милиони долари од даночните обврзници за, во соработка со Сорос, да ја дестабилизира демократски избраната, десно-центристичка влада во Македонија. Значи американската влада го финансира Сорос, а Сорос ги дели овие пари на луѓето на терен, на политичарите, на локалниет судии, обвинители, невладини организации за борба против корупција, медиумите, синдикатите“, изјави Бенц.

Во емисијата тој опишува како организацијата на Сорос, финансирана од УСАИД, ја превела познатата книга „Правила за радикалите“ на Сол Алински на македонски јазик. Оваа книга е прирачник за организирање политички револуции, бирање на емотивно набиени теми преку кои може да општеството да се подели на расни, полови и етнички линии и избор на политичките противници кои ќе бидат напаѓани и демонизирани.

На самиот почеток на истата емисија на Бенц, се осврнува на пожарот во дискотеката Колектив во Букурешт во 2015та година, предизвикан од пиротехниката употребена за време на концерт на хеви-метал група. Бенц раскажува како овој пожар бил искористен од активисти на мрежата на Сорос, обучувани во Централно-Европскиот Универзитет во Будимпешта, да организираат протести во Романија под слоганот „Корупцијата Убива“. Цитирајќи го самиот Сорос, кој своевремено се пофалил дека бил на првиот цивилен авион кој слетал во Романија по ликвидацијата на Николае Чаушеску, Бенц вели дека десетици невладини организации финансирани од радикалниот мултимилијардер работеле „да се смени традиционалната, конзервативна, православна култура на Романија, и да се промовираат социјални, либерални ставови“.

Истата приказна се повторува насекаде низ Европа. Еден налудничав, радикален политичко-пропагандистички центар со децении работи на промена на нашите општества, и за своите цели користи трагедии, несреќни случаи, предизвикува војни, сее страв и омраза. Тоа беше старото ненормално од кое човештвото деновиве очајнички се обидува да се извлече.