Македонски
Најмалку 12 луѓе загинаа, а уште 47 се повредени откако автобус со полска регистрација се преврте во Унгарија, на околу 140 километри од главниот град Будимпешта.
Несреќата се случила околу 1:00 часот по локално време (2:00 часот по македонско време) ноќеска.
Службите за итна помош во Унгарија соопштија дека десетмина од патниците во автобусот добиле тешки повреди, а 37 лица се полесно повредени, посочува ДПА.
Автобусот излетал од коловозот и паднал во канал, по што се превртил. Тешката сообраќајна несреќа се случила кај градот Мезекерестеш во источна Унгарија, соопшти полицијата. Автобусот се движел по автопатот М3 кон градот Ниреѓхаза во североисточна Унгарија кога се случила несреќата. Во возилото имало 57 патници и двајца возачи.
„Автобус со полска регистрација, кој патувал по автопатот М3 кон Ниреѓхаза, се отклонил од патот, паднал во канал и се превртил“, соопшти унгарската полиција на својата веб-страница. Полицијата додаде дека на местото на несреќата го привела возачот на автобусот.
Повредените патници од автобусот се пренесени во болница.
Станува збор за полски државјани кои, според првичните информации, се враќале од аџилак во Меѓугорје, Босна и Херцеговина.
Полското Министерство за надворешни работи потврди дека во несреќата учествувале полски туристи. Портпаролот Мацеј Вевиор изјави дека „сè укажува“ оти патниците се враќале од Меѓугорје, додека властите во полскиот град Жешов потврдија дека автобусот со аџии патувал од Босна и Херцеговина кон Подкарпачкиот регион.
Унгарската полиција соопшти дека првичните информации укажуваат оти возачот можеби заспал зад воланот. По несреќата тој бил приведен, а надлежните продолжиле со истрагата за утврдување на точните причини. Спасувачките екипи веднаш пристигнале на местото на несреќата. Поради тешко оштетениот и превртен автобус, пожарникарите морале да влегуваат низ прозорците за да стигнат до патниците.
До 3 часот наутро биле извлечени 35 лица, но неколку патници останале заробени под автобусот. За поместување на возилото, кое тежело околу 24 тони, биле ангажирани и кранови, додека пожарникарите во меѓувреме користеле витла за да го подигнат задниот дел од автобусот и да ги ослободат заробените патници.
Полскиот министер за надворешни работи Радослав Шикорски потврди дека во несреќата загинале полски државјани и соопшти дека конзуларните служби се во контакт со унгарските власти. Местото на несреќата е затворено за сообраќај поради полициската истрага. Сообраќајот се пренасочува во близина на Мезекерешеш, а возилата повторно се приклучуваат на автопатот кај Емод.
Истрагата треба да ги утврди сите околности под кои дошло до трагичната несреќа.
