Македонски
На 22 и 23 август во Хостел Китка во Вратница ќе се одржи второто издание на младинскиот камп Base Camp Љуботен – иницијатива преку која еден од најстарите планинарски клубови во земјава продолжува да ги пренесува љубовта кон планината, знаењето и вредностите на новите генерации.
Планинарскиот клуб Љуботен својата повеќе од еден век долга традиција не ја мери само во освоени врвови и организирани тури. Нејзината вистинска вредност е во континуитетот – во способноста знаењето, искуството и љубовта кон планината да се пренесуваат од една генерација на друга.
Токму од таа идеја, минатата година, кога клубот одбележа 100 години постоење, се роди Base Camp Љуботен. Она што започна како нова иницијатива, годинава продолжува со второ издание и со намера да прерасне во уште една традиција на клубот.
За разлика од првиот камп, кој се одржа доцна во есента, годинава Base Camp Љуботен се сели во лето – на 22 и 23 август во Хостел Китка во Вратница. Кампот е наменет првенствено за млади од 13 до 16 години, а во недела е предвидена и посебна програма за деца од 4 до 12 години.
Во време кога младите поминуваат сè повеќе време пред екрани, целта на клубот е да им понуди поинакво искуство – два дена во кои планината ќе стане нивна училница, а природата простор за стекнување вистински животни вештини.
Младите практично ќе учат како се поставува шатор, како се подготвува планинарска тура и ранец, како безбедно се движи во планина и како се укажува прва помош. Ќе подготвуваат заедничка вечера, ќе ноќеваат во шатори, а вториот ден ќе го применат наученото на планинарска тура до Планинарскиот дом Љуботен.
Годинашната програма оди и чекор понатаму. А1 Македонија ќе одржи едукативна сесија за сајбер-булинг и безбедно и одговорно однесување во дигиталниот свет, додека преку предавање на Македонското еколошко друштво (МЕД) младите ќе дознаат како се мониторира рисот, како се следат дивите животни и зошто нивната заштита е важна.
За најмладите, од 4 до 12 години, во недела е предвидена посебна програма со планинарска заклетва, полесна тура низ околината на Вратница, игри и едукативни активности приспособени на нивната возраст.
Долговечноста на еден клуб не се создава само со чување на неговата историја, туку со создавање луѓе кои ќе ја продолжат. ПК Љуботен опстојува повеќе од еден век затоа што генерации планинари го пренесувале своето знаење, љубовта кон планината и вредностите на оние што доаѓале по нив. Base Camp Љуботен за нас не е само дводневен камп, туку инвестиција во следната генерација – во млади кои ќе научат да ја сакаат природата, да бидат самостојни, одговорни, да си помагаат и да функционираат како заедница. Ако сакаме Љуботен да има уште сто години традиција, денес треба да им дадеме причина на младите да станат дел од неа, вели Јован Божиновски, претседател на ПК Љуботен.
Со Base Camp Љуботен, клубот не создава само уште еден настан во календарот, туку вложува во генерацијата која треба да ја продолжи неговата приказна. Затоа што традицијата не се чува само со сеќавање на минатото. Традицијата се чува кога има кому да ја предадеме.
