Македонски
Унгарскиот премиер предупреди дека се очекува „конфликт“ во рамките на ЕУ меѓу земјите што сакаат да ја поддржат Украина и оние што се за одложување на одлуките додека не завршат преговорите меѓу САД и Русија.
Унгарскиот претседател на владата, Виктор Орбан, пред самитот на Европската унија во Брисел, посочи дека основната тема на средбата ќе биде „воената состојба и мирот“, покрај мноштво други точки од дневниот ред, меѓу кои седумгодишниот буџет на ЕУ, прашањата поврзани со миграцијата и актуелната ситуација на Блискиот Исток.
Според Орбан, лидерите на ЕУ ќе дебатираат за модалитетите и обемот на помошта за Украина – дали да биде воена, финансиска или комбинација од двете. Исто така, ќе се дискутира за судбината на замрзнатите средства на Руската Федерација, како што пренесе новинската агенција МТИ.
Шефот на унгарската влада предупреди дека се очекува да дојде до „внатрешни несогласувања“ во рамките на ЕУ помеѓу членките кои се за продолжување на поддршката за Украина и оние кои преферираат одложување на одлуките до завршување на преговорите меѓу САД и Русија.
Во однос на замрзнувањето на руските средства, Орбан го обвини Брисел за „незаконита промена на претходните договори“ и за одземање на правото на вето на Унгарија, најавувајќи преземање на правни дејствија.
Тој додаде дека Унгарија пронашла сојузници меѓу државите кои сметаат дека конфискацијата на руски имот претставува „отворена декларација на војна“.
Орбан предупреди дека доколку Европската унија продолжи со вакви постапки, таа „ќе се движи кон еден нов облик на бирократска диктатура“ во која правата на суверените држави ќе бидат ставени во опасност.
Тој, исто така, упати критики кон Германија, наведувајќи дека таа „чекор по чекор се приближува кон војна“ и се стреми да ја ревитализира својата индустрија преку воени проекти.
Орбан уште еднаш потврди дека Унгарија нема да одобри конфискација на замрзнатите девизни средства на Русија или на која било друга земја, потенцирајќи дека неговата земја била „коректна“ кон ЕУ во поглед на руските средства и дека нејзините права не треба да бидат ограничувани.
