Македонски
Со стапување во сила на новиот закон за игри на среќа, кој е во владина процедура, се очекува да се намали бројот на клубови кои приредуваат игри на среќа, рече претседателот на Владата, Христијан Мицкоски во одговорот на новинарско прашање денес на настан на Машинскиот факултет во Скопје.
– По неколку месеци работа на Законот за игри на среќа и негово усогласување, тој е готов. Очекувам овој месец да ја помине владината процедура и потоа да влезе во Парламентот. Ќе има многу новини и измени и очекувам со усвојувањето законот, бројот на таквите автомат-клубови природно да биде намален, изјави Мицкоски.
Изјавата на премиерот доаѓа по вчерашната објава на министерот за дигитална трансформација Стефан Андоновски на неговиот Фејсбук профил во која се наведува дека се забрануваат 173 нови нелегални приредувачи на онлајн игри на среќа.
Oд Министерството појаснија дека станува збор за нов налог што е добиен од страна на Државната лотарија со нелегални приредувачи на Онлајн игри на среќа и истиот е проследен до АЕК за понатамошно постапување преку телеком операторите.
-Ние како Министерство постојано апелираме до граѓаните коишто имаат финансиски средства на овие страници, навремено да ги повлечат од истите и да не се подведуваат на ваквите лажни и манипулативни провајдери, бидејќи истите важат и за небезбедни, а безбедноста на интернет зависи и од самите корисници, изјавија за МИА од Министерството за дигитална трансформација.
