Македонски
Македонскиот игран филм „Македонска крвава свадба“ на режисерот Трајче Попов од 1967 година доби ново блу-реј издание. Промоцијата се одржува денеска во киното на Кинотеката во Скопје со почеток во 12 часот. Ова специјално издание претставува завршница на процесот на дигитална реставрација што институцијата го реализираше преку европскиот проект „Сезона на филмски класици“, овозможувајќи трајна заштита и современа достапност на домашната филмска класика.
Ова блу-реј издание е директен резултат на темелниот процес на дигитализација што беше спроведен во 2025 година. Филмот беше дел од иницијативата „Сезона на филмски класици“, водена од Асоцијацијата на европски кинотеки (АЦЕ), со финансиска поддршка од програмата Креативна Европа МЕДИА (Creative Europe MEDIA) на Европската Унија.
Преку ваквите меѓународни програми, македонските архивски филмски ленти добиваат технички третман според современите европски стандарди за зачувување на аудиовизуелните дела. Новото издание овозможува врвен квалитет на сликата и звукот, спакувани во современ медиум за домашните истражувачи, студенти и љубители на филмот.
Делото „Македонска крвава свадба“ е снимено според познатата истоимена театарска драма на Војдан Чернодрински од 1900 година. Сценариото и режијата на Трајче Попов претставуваат еден од темелите на раната македонска кинематографија.
На денешната промоција во Кинотеката пред присутните се обраќаат директорот Бошко Грујоски, како и вишите филмолози м-р Александар Трајковски и м-р Дамјана Патчева. Тие го образложуваат значењето на дигиталниот пренос од 35-милиметарска лента на блу-реј формат, како и важноста на реставраторската работа врз македонскиот филмски фонд.
