Македонски
Принцот Вилијам и принцезата Кејт се „длабоко загрижени“ поради најновите откритија поврзани со Џефри Епстин, соопшти портпарол на Кенсингтонската палата, а пренесе Би-би-си.
Во нивната прва јавна изјава по ова прашање, кралски портпарол изјави дека принцот Вилијам и принцезата Кејт се „фокусирани на жртвите“, во светло на новите информации содржани во документите поврзани со покојниот сексуален престапник, кои неодамна беа објавени во САД.
Ендру Маунтбатен-Виндзор е меѓу лицата кои повторно се под засилена лупа поради нивните минати врски со Епстин.
„Можам да потврдам дека принцот и принцезата се длабоко загрижени поради континуираните откритија. Нивните мисли остануваат насочени кон жртвите“, изјави портпарол на Кенсингтонската палата.
Соопштението, објавено денеска од Кенсингтонската палата, не го споменува директно Ендру, но доаѓа во период кога скандалите поврзани со поранешниот принц ризикуваат да ја засенат секоја друга кралска активност.
Тоа беше објавено во моментот кога принцот Вилијам се подготвуваше да започне официјална посета на Саудиска Арабија, патување што се смета за дипломатски многу значајно.
Иако во последниве години се појавија извештаи дека Вилијам е наклонет кон дополнително дистанцирање од неговиот компромитиран чичко, тој и другите високи членови на кралското семејство во најголем дел се воздржуваа од коментари за обвинувањата против него.
Маунтбатен-Виндзор имаше долгогодишно пријателство со Епстин и одржувал контакт со американскиот финансиски магнат и по неговата осуда за сексуално злоставување дете во 2008 година. Тој претходно се извини за своите минати врски со Епстин, но решително негира каква било вина.
Минатата недела Маунтбатен-Виндзор го напушти својот дом во Виндзор порано од предвиденото, во светло на новите информации за неговиот однос со Епстин.
Бакингемската палата претходно соопшти дека тој ќе ја напуштил кралската резиденција на почетокот на 2026 година, но заминувањето очигледно било забрзано, при што поранешниот принц сега живее на приватниот имот Сандрингем, кој е во сопственост на кралот Чарлс.
Сепак, континуираните откритија во САД го зголемија притисокот врз Маунтбатен-Виндзор, кој се соочува со повици да сведочи пред американска истрага. Меѓу големиот број документи објавени во САД има и фотографии на кои, наводно, се гледа Маунтбатен-Виндзор како клечи на сите четири над жена. За фотографиите не е даден контекст и не е јасно кога и каде се направени.
Најновите документи, исто така, изгледа ја потврдуваат автентичноста на познатата фотографија на Маунтбатен-Виндзор со неговата обвинителка Вирџинија Џуфре. Тој претходно се сомневаше дека фотографијата на која тој ја држи Џуфре околу рамото била манипулирана и тврдеше дека никогаш не ја запознал. Таа тврдеше дека била присилена да има сексуални односи со него како тинејџерка.
Но, во е-пошта за која се верува дека ја напишала соработничката на Епстин, Гислејн Максвел, која исто така се појавува на фотографијата, во 2015 година, се наведува: „Во 2001 година бев во Лондон кога [редактирано] се сретна со неколку мои пријатели, меѓу кои и принцот Ендру. Беше направена фотографија, како што претпоставувам, бидејќи таа сакаше да им ја покаже на пријателите и семејството“.
Тој отсекогаш ги негирал обвинувањата и во 2022 година постигна вонсудска спогодба со Џуфре, без признавање на одговорност или извинување.
Полицијата потврди дека ги разгледува наводите објавени од Би-би-си, според кои втора жена тврди дека била испратена во Велика Британија од Епстин за сексуална средба со Маунтбатен-Виндзор. Наводната средба се случила во неговата поранешна кралска резиденција во 2010 година. Жената, која не е британска државјанка, тогаш била во своите дваесетти години.
Други електронски пораки сугерираат дека Маунтбатен-Виндзор свесно споделувал доверливи информации со Епстин, добиени преку неговата официјална работа како трговски пратеник во периодот 2010–2011 година. Според официјалните насоки, трговските пратеници имаат обврска на доверливост за чувствителни комерцијални или политички информации поврзани со нивните официјални посети. Сепак, електронските пораки покажуваат дека поранешниот принц му доставувал извештаи од посети во Сингапур, Хонг Конг и Виетнам, како и доверливи детали за инвестициски можности – директно на Епстин.
