Македонски
Необична сцена се случила во супермаркет во Монтреал кога група луѓе облечени како Дедо Мраз, со помош на маскирани џуџиња, ги наполниле своите торби со намирници во вредност од илјадници долари и исчезнале во ноќта.
Подоцна објасниле дека станува збор за акција во стилот на Робин Худ, со која сакале да предупредат на сè посериозната криза и трошоците за живот, што ги направило основните потреби недостапни за обичните Канаѓани, пишува „Гардијан“.
Околу 40 членови на групата позната како „Робин де Руелс“ учествувале во грабежот, кој се случил доцна синоќа. Во соопштението насловено како „Кога гладот ги оправдува средствата“, тие објавија дека храната ќе им биде поделена на оние на кои им е потребна.
„Работиме сè понапорно и понапорно само за да можеме да купуваме храна од синџири супермаркети кои ја користат инфлацијата како изговор за да остварат рекордни профити“, се вели во соопштението. „Нема друг начин да се каже: неколку компании ги држат нашите основни потреби како заложници“, додадоа тие, обвинувајќи ги големите компании дека „продолжуваат да го задушуваат населението со цел да одземат што е можно повеќе пари“.
Полицијата потврдила дека ја истражува кражбата, но досега никој не е уапсен. Во вторник вечерта, групата оставила дел од храната на јавниот плоштад под елката, наведувајќи дека остатокот ќе биде дистрибуиран преку локалните банки за храна.
