Македонски
Шверцерите ја користат целата своја досетливост за да шверцуваат влекачи, инсекти, птици, па дури и загрозени видови во Велика Британија.
За само еден месец, објавува „Телеграф“, британските граничари запленија повеќе од 250 нелегални производи од див свет на аеродроми, пристаништа и пошти низ целата земја.
Наодите беа објавени од британското Министерство за внатрешни работи како дел од меѓународната операција против нелегална трговија со диви животни наречена „Операција Гром“.
Само во еден случај, британските власти запленија пратка од 2.000 тарантули , во вредност до 80.000 евра. Возрасни тарантули, скриени во возило, се продаваат на црниот пазар за цена помеѓу 50 и 500 фунти (57 и 570 евра), во зависност од видот. Во Довер, две змии боа констриктор беа пронајдени под ќебиња. Возачот рече дека ги купил змиите од германска изложба на влекачи без дозвола.
Повеќе од 100 загрозени егзотични птици, вклучувајќи ги и црвените ибиси и папагали, беа натрупани во автомобил во бедни услови. Некои од птиците умреа за време на патувањето.
Покрај живите животни, запленети се и слонова коска од САД, мелем од кралска кобра (направен од екстракт од отров) од Тајланд и вилица од ајкула од Австралија. Сите биле наменети за продажба на британскиот црн пазар.
Се проценува дека криумчарењето на диви животни вреди повеќе од 20 милијарди евра годишно, што го прави четвртиот најголем меѓународен криминал, по огнено оружје, дрога и трговија со луѓе.
Интерпол, кој ја координираше меѓународната операција, соопшти дека оваа година се запленети речиси 30.000 живи животни низ целиот свет и се идентификувани 1.100 осомничени трговци со диви животни.
Во меѓувреме, нелегалната трговија со диво месо од Африка до Европа драстично се зголеми, со рекордни 5,8 тони диво месо запленето низ целиот свет, според Интерпол.
Белгиските власти запленија пратка месо од примати (мајмуни или шимпанза), додека кениските власти запленија над 400 кг месо од жирафа, а танзанските власти открија месо и кожа од зебри и антилопи во вредност од околу 7.500 фунти.
Исто така, имаше огромно зголемување на трговијата со егзотични членконоги, при што речиси 10.500 пеперутки, пајаци и инсекти се запленети низ целиот свет.
