Студент уапсен во Полска под сомнение за планирање „масовен напад“ на божиќен пазар

МИА

Полските безбедносни служби соопштија дека го уапсиле студентот, Матеуш В., од Католичкиот универзитет во Лублин, под сомнение за подготовка на „масовен напад“ на божиќен пазар.

Според портпаролот на специјалните служби, Јацек Добжински, истражителите веруваат дека планот вклучувал експлозиви и имал за цел „поддршка на Исламската држава“, а властите исто така тврдат дека тој се обидел да воспостави контакт со терористичка организација за да добие помош за извршување на нападот.

Добжински на прес-конференција додаде дека истражителите „не пронашле траги од руски врски“.

Обвинителите го обвинија студентот за подготовка на терористички напад што може да предизвика масовна смрт или сериозни повреди, и тој е во притвор за почетни три месеци.