Македонски
Венецуелскиот претседател Николас Мадуро денеска изјави дека земјата ќе продолжи со трговијата со нафта, еден ден откако американскиот претседател Доналд Трамп објави „блокирање“ на санкционираните танкери за нафта што влегуваат или излегуваат од Венецуела.
Мадуро рече дека намерата на Трамп е промена на режимот во Венецуела и рече дека тоа нема да се случи, објави Еј-Би-Си. Тој нагласи дека нафтата и природните ресурси, според Уставот, им припаѓаат на народот на Венецуела.
Во вторникот, Трамп објави на својата социјална мрежа „целосна блокада на сите санкционирани танкери за нафта што влегуваат и излегуваат од Венецуела“ и побара враќање на нафтата и средствата за кои тврди дека претходно биле запленети од САД. Тој не прецизираше за кои средства се однесува ова тврдење.
Венецуелската влада ја опиша изјавата на Трамп како „неодговорна и сериозна закана“ и рече дека ваквите најави го кршат меѓународното право, слободната трговија и слободата на навигација. Таа објави дека нејзиниот амбасадор во Обединетите нации ќе продолжи да го осудува она што го нарече кршење на меѓународното право и ја повика меѓународната заедница да ја отфрли најавата на Трамп.
САД моментално имаат 11 воени бродови во Карибите, но според проценките, ова нема да биде доволно за да се воспостави целосна поморска блокада во традиционална смисла, што би вклучувало затворање на брегот на земјата.
Најавата на Трамп дојде откако САД минатата недела запленија санкциониран танкер за нафта покрај брегот на Венецуела, за кој американските претставници рекоа дека бил вклучен во нелегална мрежа за шверц на нафта и дека транспортирал нафта помеѓу Венецуела и Иран, на пат кон Куба. Мадуро го нарече запленувањето „чин на меѓународно пиратство“.
Министерството за финансии на САД минатиот четврток воведе санкции за уште шест танкери и шест превозни компании за наводен транспорт на венецуелска сурова нафта. Министерството за финансии соопшти дека мерките се насочени кон нафтениот сектор на Венецуела, за кој вели дека го финансира нелегитимниот режим на Мадуро.
Санкциите се дел од поширок пакет кој вклучува и членови на семејството на Мадуро и еден соработник. Според извештаите, флотата на санкционирани бродови вклучени во транспортот на венецуелска нафта брои околу 30, додека повеќе од десетина санкционирани танкери моментално се наоѓаат во венецуелските води.
Венецуела има најголеми познати резерви на нафта во светот, а извозот на нафта е главен извор на приходи на владата. Трамп постојано ја осудува владата на Мадуро како „непријателски режим“, а минатиот месец го назначи Мадуро за шеф на странска терористичка организација, тврдејќи дека приходите од нафта се користат за финансирање, како што вели тој, на тероризам, трговија со дрога и други криминални активности.
