Македонски
Наглото зголемување на цените на енергијата и храната турка сè повеќе германски потрошувачи во инсолвентност, со регистрирани 107.816 лични банкроти во 2025 година, според податоците објавени денеска од давателот на информативни услуги ЦРИФ.
Ова претставува зголемување од 7,8 проценти во однос на 2024 година, а се очекува бројките дополнително да растат, пренесе ДПА.
И покрај генерално поголемата подготвеност за штедење, многу домаќинства веќе немаат доволно резерви за да ги апсорбираат растечките трошоци, изјави Франк Шлајн, извршен директор на CRIF во Германија. Просечниот долг по инсолвентно домаќинство изнесувал околу 15.000 евра.
CRIF моментално проектира 110.000 лични банкроти во Германија во 2026 година, што би го надминало нивото од 2021 година со нешто повеќе од 109.000 случаи. Тој скок делумно се должеше на промената на законот со која се скрати периодот за ослободување од долгови од шест на три години, што наведе некои домаќинства да го одложат поднесувањето барања.
Главни двигатели на личната инсолвентност остануваат невработеноста, неуспешното самовработување, разделувањето или разводот и здравствените проблеми.
Групите со најбрз раст во 2025 година беа младите од 18 до 20 години, со пораст од 52,6 проценти и оние од 21 до 30 години, со пораст од 28,6 отсто. Од CRIF велат дека импулсивните купувања на рати, вклучително и услугите „купи сега, плати подоцна“, се делумно одговорни за ова.
Заштитниците на потрошувачите предупредуваат дека таквите шеми можат да ги охрабрат луѓето да го преценат својот финансиски капацитет и да преземат поголем долг отколку што можат да си дозволат.
