Македонски
Двајца осомничени кои беа уапсени минатиот викенд за учество во грабежот на вредни предмети од парискиот музеј Лувр, потекнуваат од Обервилие, во парискиот регион, пренесуваат француските медиуми.
Осомничените, на возраст од околу 30 години, биле уапсени во саботата и се наоѓаат во притвор, кој ќе трае до 96 часа, а од претходно ѝ се познати на полицијата, пренесува БФМ ТВ.
Еден од осомничените бил уапсен во саботата вечерта на аеродромот „Роаси-Шарл де Гол“ додека се обидувал да се качи на лет за Алжир, додека вториот бил уапсен во Обервилие. Двајцата биле под истрага во изминатите неколку дена.
Како што истакнува француската телевизија, на местото на грабежот била пронајдена „одлучувачка ДНК трага“, а станува збор за отпечаток од прст. Париската обвинителка Лор Беко во четвртокот изјави дека за потребите на истрагата биле земени повеќе од 150 ДНК примероци.
Грабежот се случи на 19 октомври во парискиот Лувр, кога беа украдени девет предмети од колекцијата на кралското семејство. Четворица крадци влегле во зградата од страната што гледа кон реката Сена, каде што се во тек градежни работи, користејќи товарна платформа (лифт) за директно да пристапат до галеријата Аполо.
Меѓу украдените предмети има дијадеми, ѓердани, обетки и брошеви кои им припаѓале на царицата Мари-Луиз, кралицата Хортензија, кралицата Мари-Амели и царицата Евгенија, сопругата на Наполеон Трети. Круната на царицата Евгенија исто така била украдена, но била пронајдена оштетена во близина на музејот, откако крадците ја испуштиле при бегството.
Вредноста на украдените експонати се проценува на 88 милиони евра.
