Македонски
Повеќе од третина од околу 220.000 лица уапсени во првите девет месеци за време на администрацијата на американскиот претседател Доналд Трамп од страна на службениците на Службата за имиграција и царинско спроведување (ИЦЕ) немаат никакво криминално досие, покажуваат новите податоци.
Податоците, кои ги опфаќаат апсењата од 20 јануари до 15 октомври, покажуваат дека речиси 75.000 лица без претходни пресуди биле уапсени во имиграциски операции што претседателот на САД и високите функционери ги опишуваат како насочени кон убијци, силувачи и членови на банди, пренесе Ен-Би-Си.
– Ова е во спротивност со тврдењата на администрацијата дека се работи за лица осудувани за кривични дела и дека таргетираат ‘најлоши меѓу најлошите’, изјави Ариел Руиз Сото, виш политички аналитичар во Институтот за миграциска политика.
Овие бројки даваат најдетален увид досега во спроведувањето на имиграциската политика на администрацијата на Трамп. Податоците ги објави Проектот за податоци за депортација на Универзитетот во Калифорнија, Беркли, кој до нив дошол преку тужба против ИЦЕ.
Податоците биле составени од внатрешната единица на ИЦЕ задолжена за апсење, притвор и депортација. Администрацијата престана со редовно објавување детални информации за апсењата уште во јануари.
За лицата со криминално минато, податоците не прават разлика меѓу ситни прекршоци и сериозни кривични дела како силување или убиство, на кои администрацијата тврди дека се насочени операциите.
Бројките не ги вклучуваат апсењата на Граничната патрола, која започна агресивни имиграциски акции во неколку градови, меѓу кои Чикаго, Лос Анџелес и Шарлот во Северна Каролина. Во моментов се во тек рации во Њу Орлеанс.
Теренските канцеларии на ИЦЕ биле под силен притисок да го зголемат бројот на апсења. Во средината на мај, заменик-шефот на кабинетот во Белата куќа, Стивен Милер, им се заканил со отпуштање на повисоки службеници на ИЦЕ ако не почнат да апсат најмалку 3.000 мигранти дневно. Но, новите податоци покажуваат дека ИЦЕ и понатаму е далеку од тие цели.
Агенцијата во просек апсела 824 лица дневно од 20 јануари. Тоа е над двојно повеќе од дневниот просек за време на администрацијата на Џо Бајден во 2024 година, кога ИЦЕ дневно апсеше 312 лица.
Податоците, исто така, покажуваат дека околу 90 проценти од уапсените се мажи. Мексиканските државјани сочинуваат најголем дел – околу 85.000, потоа од Гватемала со 31.000 и Хондурас со 24.000.
Повеќе од 60 проценти од уапсените се на возраст меѓу 25 и 45 години. Засега не е јасно колку од нив се депортирани, но 22.959 се заведени како „доброволно заминување“, што значи дека самостојно ја напуштиле земјата.
ИЦЕ моментално држи околу 65.000 мигранти во притворни центри низ САД, според податоци на Министерството за внатрешна безбедност објавени онлајн.
